Latin
Book 3, lines 3.1.236-3.1.282
Sedulius, Carmen Paschale 3.1.236-282
Not analysed yet
Genesar inde soli Domino veniente coloni
Infirmos traxere suos, ut fimbria saltim
Vix adtacta Dei morbis mederetur acerbis:
Et quotquot tetigere iugem sensere salutem.
Quam pretiosa fuit quae numquam vendita vestis,
Ipsa omnes modici redimebat munere fili!
Hinc Tyrias partes Sidoniaque arva petentem
Anxia pro natae vitio, quam spiritus atris
Vexabat stimulis, mulier Chananaea rogabat,
Se canibus confessa parem, qui more sagaci
Semper odoratae recubant ad limina mensae,
Adsueti refluas dominorum lambere micas.
Vox humilis, sed celsa fides, quae sospite nata
De cane fecit ovem gentisque in sentibus ortam
Conpulit Hebraei de gramine vescier agri.
Alta dehinc subiens montis iuga plebe sequente
Milia caecorum, claudorum milia passim
Leprososque simul populos surdasque catervas
Invalidasque manus et quidquid debile vulgi
Venerat, in priscum conponit motibus usum
Et revocata suis adtempterat organa nervis.
Dumque medens aegrum refovet virtute tumultum,
Tertia lux aderat, sterilique in cespite nullum
Contigerat plebs tanta cibum, nimiosque labores
Nutribat geminanda fames si saucia callem
Turba per ingentem dapibus ieiuna rediret.
Qua flexus pietate Deus, qui semper egentum
Panis adest victumque locis sine frugibus infert,
Pisciculis paucis et septem panibus agmen
Pavit inorme virum, praeterque infirma secundi
Sexus et aetatis saturavit quattuor illic
Milia vescentum. plus ut mireris, et auctas
Disce fuisse dapes, epulas nutrivit edendo
Vulgus, et adtritae creverunt morsibus escae.
Reliquiasque suas, sportarum culmina septem,
Expavit fugitiva fames, ubi fragmine sumpto
Vidit abundantem modico de semine messem.
Nec tamen humano quamvis in corpore Christum,
Matris ab occasu mortalia membra gerentem,
Clam fuit esse Deum, quia non absconditur umquam
Urbs in monte sedens, modio nec subditur ardens
Lychnus, anhelantem sed spargens altius ignem
Cunctis lumen agit: radians nam testibus amplo
Discipulis fulgore tribus velut igneus ardor
Solis, in aetheriam versus splendore figuram,
Vicerat ore diem, vestemque tuentibus ipsam
Candida forma nivis Domini de tegmine fulsit.