Latin · ~8 min · Dactylic hexameter
Lines 4.187-4.240
Statius, Thebais 4.187-240
Not analysed yet
Iamque et fatidici mens expugnata fatiscit
auguris; ille quidem casus et dira videbat
signa, sed ipsa manu cunctanti iniecerat arma
Atropos obrueratque deum, nec coniugis absunt
insidiae, vetitoque domus iam fulgurat auro.
hoc aurum vati fata exitiale monebant
Argolico; scit et ipsa 1—nefas! —sed perfida coniunx
dona viro mutare velit, spoliisque potentis
imminet Argiae raptoque excellere cultu.
illa libens—nam regum animos et pondera belli
hac nutare videt, pariter ni providus heros
militet—ipsa sacros gremio Polynicis amati
exuerat cultus haud maesta atque insuper addit:
non haec apta mihi nitidis ornatibus inquit,
‘tempora, nec miserae placeant insignia formae
te sine: sat dubium coetu solante timorem
fallere et incultos aris advertere crines.
scilicet—infandum 1! —. cum tu eludare minanti
casside ferratusque sones. ego divitis aurum
Harmoniae dotale geram? dabit aptior ista
fors deus. Argolicasque habitu praestabo maritas,
cum regis coniunx, cum te mihi sospite templa
votivis implenda choris: nunc induat illa,
quae petit et bellante potest gaudere marito.’
sic Eriphylaeos aurum fatale penates
inrupit scelerumque ingentia semina movit,
et grave Tisiphone risit gavisa futuris.
Taenariis hic celsus equis, quam dispare coetu
Cyllarus ignaro generarat Castore prolem,
quassat humum; vatem cultu Parnassia monstrant
vellera: frondenti crinitur cassis oliva
albaque puniceas interplicat infula cristas,
arma simul pressasque iugo moderatur habenas.
hinc atque inde morae iaculis, et ferrea curru
silva tremit; procul ipse gravi metuendus in hasta
eminet et clipeo victum Pythona coruscat.
huius Apollineae currum comitantur Amyclae,
quos Pylos et dubiis Malea vitata carinis
plaudentique habiles Caryae resonare Dianae,
quos Pharis volucrumque parens Cythereia Messe,
Taygetique phalanx et oloriferi Eurotae
dura manus, deus ipse viros in pulvere crudo
Arcas alit nudaeque modos virtutis et iras
ingenerat; vigor inde animis et mortis honorae
dulce sacrum, gaudent natorum fata parentes
hortanturque mori, deflent iamque omnis ephebum
turba, coronato contenta est funere mater,
frena tenent duplexque inserto missile nodo,
exserti ingentes umeros, chlamys horrida pendet,
et cono Ledaeus apex. non hi tibi solum,
Amphiarae, merent: auget resupina maniplos
Elis, depressae populus subit incola Pisae,
qui te. flave, natant terris, Aiphee, Sicanis
advena, tam longo non umquam infecte profundo.