Latin
Book 3, lines 3.1.61-3.1.73
Theodosian Code, Theodosii Imperatoris Codex 3.1.61-73
Not analysed yet
CTh. 3. 3. 1 [=brev. 3. 3. 1]
Imppp. valentin. ,theodos. et arcad. aaa. tatiano pf. p. omnes, quos parentum miseranda fortuna in servitium, dum victum requirit, addixit, ingenuitati pristinae reformentur. nec sane remunerationem pretii debet exposcere, cui non minimi temporis spatio satisfecit ingenuus. dat. v. id. mart. mediolano, tatiano et symmacho coss.
interpretatio. si quemcumque* ingenuum pater faciente egestate vendiderit, non poterit in perpetua servitute durare, sed ad ingenuitatem suam, si servitio suo satisfecerit, non reddito etiam pretio, revertatur
CTh. 3. 4. 0. De aediliciis actionibus.
CTh. 3. 4. 1 [=brev. 3. 4. 1]
Imppp. valentin. ,theodos. et arcad. aaa. nebridio pf. u. habito semel bonae fidei contractu mancipioque suscepto et pretio dissoluto, ita demum repetendi pretii potestas est ei, qui mancipium comparaverit, largienda, si illud, quod dixerit fugitivum, potuerit exhibere. hoc enim non solum in barbaris, sed etiam in provincialibus servis iure praescriptum est. dat. iii. kal. iul. constantinopoli, honorio n. p. et evodio v. c. coss.
interpretatio. quum inter emptorem* ac venditorem de mancipii pretio convenerit et fuerit conscripta venditio, nullatenus poterit revocari, nisi forte ille, qui emit mancipium, probaverit fugitivum, et tunc habebit licentiam pretium recipere, si mancipium reddiderit venditori
CTh. 3. 5. 0. De sponsalibus et ante nuptias donationibus
CTh. 3. 5. 1 [=brev. 3. 5. 1]
Imp. constantinus a. ad rufinum pf. p. pater noster nullam voluit liberalitatem valere, si actis inserta non esset. nos etiam inter sponsos ac sponsas omnesque personas eam solam donationem ex promulgatae legis tempore valere sancimus, quam testificatio actorum secuta est. dat. iv. id. mai. sirmio, constantino a. v. et licinio caes. coss.
interpretatio. ante tempus legis istius donationes etiam sine gestorum testificatione valebant. nunc vero post hanc legem nec nuptialis nec quaelibet alia inter quascumque* personas donatio, de quibuscumque* rebus, valere potest, si gestis non fuerit allegata
CTh. 3. 5. 2pr. [=brev. 3. 5. 2. pr.]
Idem a. ad maximum pf. u. quum veterum sententia displiceat, quae donationes in sponsam nuptiis quoque non secutis decrevit valere, ea, quae largiendi animo inter sponsos et sponsas iure celebrantur, redigi ad huiusmodi condiciones* iubemus, ut, sive in potestate patris degere sive ullo modo proprii videantur esse iuris, et tanquam futuri causa matrimonii aliquid sibi ipsi vel consensu parentum mutuo largiantur, siquidem sponte vir sortiri noluerit uxorem, id, quod ab eo donatum fuerit, nec repetatur traditum, et si quid apud donatorem resedit, ad sponsam summotis ambagibus transferatur.