1.4661 to 1.4667

4661 Ἀφυήϲ: ἀμαθὴϲ, ἄπειροϲ. ὁ δὲ ἦν οὐκ ἀφυὴϲ ϲυνιδεῖν πραγμάτων ϲτρατηγίαϲ. καὶ Πολύβιοϲ· οὗ καιρὸϲ ἀφυέϲτεροϲ οὐ γέγονεν ἁπλῶϲ. 4662 Ἀφυΐα: ἡ πρὸϲ τὰ προκείμενα μαθήματα ϲκληρότηϲ. 4663 Ἄφυκτα: ἀναπόδραϲτα, ἀναγκαῖα. καὶ Ἄφυκτον, ὃ οὐκ ἔϲτιν ἐκφυγεῖν. 4664 Ἀφυϲμόϲ: ἀπάντληϲιϲ. 4665 Ἀφύϲϲων: ἀπαντλῶν, ἀρυόμενοϲ. 4666 Ἀφ᾿ ὑψηλοῦ μου καταγελᾷϲ: οἱονεὶ πάνυ μου καταφρονεῖϲ. ἡ μεταφορὰ ἀπὸ τῶν ἀφ᾿ ὕψουϲ διαλεγομένων. 4667 Ἀχαάβ: ὄνομα κύριον.