Latin · Dactylic hexameter
III. 〈in Ecclesia Mariae a Bugge Exstructa〉., lines 3.1-3.49
Aldhelm, Ald. Carm. eccl. 3.1-49
Not analysed yet
Hoc templum Bugge pulchro molimine structum
Nobilis erexit Centvvini filia regis,
Qui prius imperium Saxonum rite regebat,
Donec praesentis contemnens culmina regni
Divitias mundi rerumque reliquit habenas,
Plurima basilicis impendens rura novellis,
Qua nunc Christicolae servant monastica iura.
Exin sacratam perrexit quaerere vitam,
Dum proprium linquit Christi pro nomine regnum;
Qui tamen ante tribus gessit certamina pugnis
Et ternis pariter confecit bella triumphis.
Sic rexit regnum plures feliciter annos,
Donec conversus cellam migravit in almam.
Inde petit superas meritis splendentibus arces
Angelicis turmis ad caeli culmina ductus;
Caelicolis iunctus laetatur sorte superna.
Post hunc successit bello famosus et armis
Rex Caedvvalla, potens regni possessor et heres;
Sed mox imperium mundi sceptrumque relinquens
Turgida cum ratibus sulcabat caerula curvis
Et maris aequoreos lustrabat remige campos.
Algida ventosis crepitabant carbasa flabris,
Donec barca rudi pulsabat litora rostro;
Exin nimbosas transcendit passibus Alpes
Aggeribus niveis et montis vertice saeptas.
Cuius in adventu gaudet clementia Romae
Et simul ecclesia laetatur clerus in urbe,
Dum mergi meruit baptismi gurgite felix.
Post albas igitur morbo correptus egrescit,
Donec mortalis clausit spiracula vitae
Alta supernorum conquirens regna polorum,
Clarum stelligeri conscendens culmen Olimpi.
Sed hic principibus caelum penetrantibus altum,
Quorum descripsi iam bina vocabula dudum,
Tertius accepit sceptrum regnator opimum,
Quem clamant Ini certo cognomine gentes;
Qui nunc imperium Saxonum iure gubernat.
Quo regnante novum praecelsa mole sacellum
Bugge construxit, supplex vernacula Christi,
Qua fulgent arae bis seno nomine sacrae;
Insuper absidam consecrat Virginis arae.
Praesentem ergo diem cuncti celebremus ovantes
Et reciproca Deo modulemur carmina Christo!
Menstrua volvuntur alternis tempora festis
Et vicibus certis annorum lustra rotabunt:
Dulcibus antifonae pulsent concentibus aures
Classibus et geminis psalmorum concrepet oda;
Ymnistae crebro vox articulata resultet
Et celsum quatiat clamoso carmine culmen!