Latin
Lines 1679-1724
Avienus, Aratea 1679-1724
Not analysed yet
Denique cum caelo tenduntur pura serena,
si ruitura polo sunt flamina, primus in ipsa
mox picturati conuertit pectoris artus
sturnus edax, premat ut tenui uis obuia plumas
et ne post tergum pateat penetrabilis Euro.
Latipedemque anatem cernes excedere ponto
saepius et summa nebulam se tendere rupe,
iamque super latices florum uolitare senectam,
stellarumque comas rumpi procul, aethere celso
decidere in terras, rutilarum spargere crines
flammarum et longos a tergo ducere tractus:
inde etiam uentos mox adfore praemonet usus.
Quod si diuersis se passim partibus ignes
excutiant, uerret pelagus sine fine modoque
turba procellarum, si duri limite ab Euri,
si regione Noti, si lenis parte Fauoni
aut de Bistonio mundi procul axe coruscat.
Vellera si caelo uolitent, si discolor Iris
demittat gemino se fornice, circulus albam
si stellam taeter uelut ambiat, aequora propter
si crepitent uolucres, si gurgite saepius alto
pectora mersentur, si crebro garrula hirundo
stagna adeat, rutilae cum sint primordia lucis,
si repetunt ueterem ranae per stagna querelam,
si matutinas ululae dant carmine uoces,
improba si cornix caput altis inserit undis
flumine terga rigans, si saeuit gutture rauco,
plurimus abruptis fundetur nubibus imber.
Imber erit, latis cum bucula naribus auras
concipit, et late pluuiis sola cuncta madebunt,
cum proprias sollers sedes formica relinquens
oua cauis effert penetralibus (aspera quippe
tempestas gelidusque dies et frigidus aether
inserit internis terrarum sedibus aestus),
pectora cum curuo purgat gallinula rostro,
agmine cum denso circumuolitare uidetur
graculus et tenui cum stridunt gutture corui,
cum procera salum repetit clangore frequenti
ardea, cum paruae defigunt spicula muscae;
et si nocturnis ardentibus undique testis
concrescant fungi, si flammis emicet ignis
effluus aut lucis substantia langueat ultro,
conuenit instantes praenoscere protinus imbres.
Denique cum patulum torret Vulcanus aenum,
scintillas flamma circumlambente relinquit
si Notus humentis Libyco trahit aethere nubes.