urn:cts:latinLit:phi0474.phi037.perseus-lat2, Book 2

Sed ex his omnibus nihil magis ridetur, quam quod est praeter exspectationem, cuius innumerabilia sunt exempla, vel Appi maioris illius, qui in senatu, cum ageretur de agris publicis et de lege Thoria et peteretur Lucullus ab eis, qui a pecore eius depasci agros publicos dicerent, non est inquit Luculli pecus illud; erratis; —defendere Lucullum videbatur—ego liberum puto esse: qua libet pascitur.