Latin
PROP. II. THEOR. II
Newton, Optice 36
Unproofread scanNot analysed yet
Sit F Foramen majusculum in fenestra operculo, per quod Solis Lumen transmittatur ad primum Prisma ABC: Incidatque refractum Lumen, in mediam partem tabulae DE; istiusque luminis pars media, in foramen G. Lumen per id foramen transmissum, incidat deinceps in mediam partem secundae tabulae de, ibique oblongam coloratam Solis imaginem talem, qualem in tertio supra Experimento descripsimus, depingat. Ista imago, converso lente hac illac circa Axem suum Prismate ABC, movebitur sursum deorsum super tabula d e; eoque pacto fieri poterit, ut singulae ipsiupartes per tabulae illius secundae foramen g ordine transmittantur. Interea aliud Prisma a bc post istud foramen g collocandum est; quo Lumen per id foramen transmissum, denuo refringatur. His ita dispositis, notavi in opposito pariete loca M &N, in quae Lumen refractum incideret: Eaque observatione rem ita se habere comperi, ut dum binae tabulae &Prisma secundum fixa immotaque manerent, ista loca, converso circa Axem suum primo Prismate, assiduo mutarentur. Etenim cum pars inferior ejus Luminis, quod in secundam tabulam d e incidebat, transmitteretur per foramen g; pergebat ad inferiorem in pariete locum M: Cum autem superior pars ejusdem Luminis, per forameng transmitteretur; pergebat ad superiorem in pariete locum N: Cumque media aliqua pars ejusdem Luminis per idem foramen transmitteretur; pergebat ad locum aliquem in pariete medium inter M &N. Quoniam foraminum in tabulis positio nihil mutabatur; utique Radiorum in secundum Prisma Incidentia, in hisce omnibus casibus una atque eadem fuit.