Latin · ~7 min · Dactylic hexameter
Lines 3.1-3.43
Persius, Satires 3.1-43
Not analysed yet
nempe haec adsidue? iam clarum mane fenestras
intrat et angustos extendit lumine rimas;
stertimus, indomitum quod despumare Falernum
sufficiat, quinta dum linea tangitur umbra,
en quid agis? siccas insana canicula messes
iam dudum coquit et patula pecus omne sub ulmo est
unus ait comitum. verumne? itan? ocius adsit
huc aliquis, nemon? turgescit vitrea bilis:
findor ut Arcadiae pecuaria rudere credas,
iam liber et positis bicolor membrana capillis
inque manus chartae nodosaque venit harundo;
tunc querimur crassus calamo quod pendeat umor,
nigra set infusa vanescit sepia lympha;
dilutas querimur geminet quod fistula guttas.
O miser inque dies ultra miser, hucine rerum
venimus? aut cur non potius teneroque columbo
et similis regum pueris pappare minutum
poscis et iratus mammae lallare recusas?
An tali studeam calamo? cui verba? quid istas
succinis ambages? tibi luditur. effluis amens,
contemnere: sonat vitium percussa maligne
respondet viridi non cocta fidelia limo.
udum et molle lutum es, nunc nunc properandus et acri
fingendus sine fine rota. sed rure paterno
est tibi far modicum, purum et sine labe salinum
(quid metuas?) cultrixque foci secura patella,
hoc satis? an deceat pulmonem rumpere ventis,
stemmate quod Tusco ramum millesime ducis
censoremve tuum vel quod trabeate salutas?
ad populum phaleras! ego te intus et in cute novi.
non pudet ad morem discincti vivere Nattae?
sed stupet hic vitio et fibris increvit opimum
pingue, caret culpa, nescit quid perdat, et alto
demersus summa rursus non bullit in unda.
Magne pater divum, saevos punire tyrannos
haut alia ratione velis, cum dira libido
moverit ingenium ferventi tincta veneno:
virtutem videant intabescantque relicta,
anne magis Siculi gemuerunt aera iuvenci,
et magis auratis pendens laquearibus ensis
purpureas subter cervices terruit, imus
imus praecipites quam si sibi dicat et intus
palleat infelix quod proxima nesciat uxor?