Latin · ~6 min
Act 3
Terence, Hecyra 3.4
Not analysed yet
Ain tu tibi hoc incommodum evenisse iter?
Non hercle verbis, Parmeno, dici potest
Tantum quam re ipsa navigare incommodum est.
Itane est?
O fortunate, nescis quid mali
Praeterieris qui nunquam es ingressus mare.
Nam alias ut omittam miserias, unam hanc vide:
Dies triginta aut plus eo in navi fui,
Cum interea semper mortem exspectabam miser;
Ita usque adversa tempestate usi sumus.
Odiosum.
Haud clam me est: denique hercle aufugerim
Potius quam redeam, si eo mihi redeundum siet.
Olim quidem te causae impellebant leves
Quod nunc minitare facere ut faceres, Sosia.
Sed Pamphilum ipsum video stare ante ostium.
Ite intro: ego hunc adibo si quid me velit.
Here, etiam tu hic stas?
Et quidem te exspecto.
Quid est?
In arcem transcurso opus est.
Cui homini?
Tibi.
In arcem? quid eo?
Callidemidem hospitem
Myconium, qui mecum una advectus est, conveni.
Perii! vovisse hunc dicam, si salvus domum
Redisset unquam, ut me ambulando rumperet.
Quid cessas?
Quid vis dicam? an conveniam modo?
Immo, quod constitui me hodie conventurum eum
Non posse; ne me frustra illic exspectet: vola.
At non novi hominis faciem.
At faciam ut noveris.
Magnus, rubicundus, crispus, crassus, caesius,
Cadaverosa facie.
Di illum perduint.
Quid si non veniet? maneamne usque ad vesperum?
Maneto: curre.
Non queo; ita defessus sum.
Ille abiit: quid agam infelix? prorsus nescio
Quo pacto hoc celem quod me oravit Myrrhina,
Suae gnatae partum; nam me miseret mulieris.
Quod potero faciam, tamen ut pietatem colam;
Nam me parenti potius quam amori obsequi
Oportet. Atat eccum Phidippum et patrem
Video: horsum pergunt. Quid dicam hisce incertus sum.