θεοδωρήτου ἐπισκόπου κύρου ἑρμηνεία εἰς τὸν προφήτην δανιήλ, τόμος ι

καὶ τοὺς ἀνομοῦντας φησὶ διαθήκην ἀπάξουσιν ἐν ὀλισθήμασι. τοὺς γὰρ παρανομίᾳ συζῶντας προφανῶς δυσσεβεῖν παρασκευάσουσι τοῖς ἀπατηλοῖς χρώμενοι λόγοις. καὶ λαὸς γινώσκοντες θεὸν αὑτῶν, κατισχύσουσι καὶ ποιήσουσι. τοὺς περὶ τὸν μακάριον ἐνταῦθα ματταθίαν αἰνίττεται, ὃς πρῶτος τοῖς τοῦ ἀντιόχου δόγμασιν ἀντιστὰς καὶ σὺν τοῖς υἱέσι τὴν ἔρημον καταλαβὼν μετ’ ὀλίγων στρατευόμενος τοὺς ἐκείνου κατηγωνίσατο στρατηγούς.